بعض النصائح
للشباب اللى نفسهم يشتغلو فبنك كويس وكده
اولا لو عاوز تشتغل فبنك
لازم تكون جاهز انك تسعى سعى جامد جدا
وطبعا كله بايد ربنا مسبب الاسباب بس تعمل اللى عليك يعنى
اولا لازم كل اسبوع او اتين تروح تلف على كل البنوك ايوه كل البنوك خد شله من اصحابك وابدئو تدورو سوا
طيب بالنسبه للبنوك اللى بتطلب كتير
عندكو تنميه الصادرات المصريه مش تستقلو بيه ده بنك كويس اوى ومرتبه جميل جدا
هتروح شارع محى الدين ابو العز تدى سفيهاك للامن تحت ومتخفش السى فى هيطلع
فوق وهيتصلو بيك ان شاء الله ولمعلوماتك البنك طالب اليومين دول اللى فاضى
يروح بسرعه اللى هيتصلو بيه بقى هيقوم رايح انترفيو مع حبه بنات زى السكر
لذاذ اوى وهيسالوك اسئله عامه خالص وهيكلموك شويه بالانجلش فالذيذ كده
وهيقولولك هنتصل بيك خلال اسببوعين نقولك على معاد امتحان فاينانس
وماركتنج واكونتنج وذكاء
*طيب فيه بنك جنبه اسمه التمويل المصرى السعودى ده بنك متوسط مرتبه معقول
3 انترفيو فيوم واحد وانت وحظك وشطارتك تقدمله ازاى ده يا جماعه بيقبل عن
طريق البريد بس 455 ص ب الدقى اداره الموارد البشريه
* طيب عندكو بقى الاتش اس بى سى البنك ده من البنوك الجامده فحت هتروح
هناك وتقولهم عاوز ادخل للموارد البشريه يقولك ليه قوله هقدم سى فى قالك
هاته هدهولهم قوله لاء هدخله بنفسى بعد اذنك وتقوم مدخله وتحاول تاخد معاد
امتحان من استاذه دينا وامتحانهم الحقيقه صعب جدا ذكاء وانجلش تحاول تستعد
طحن طبعا مرتبتهم خيال
*بنك العربى روح للموارد البشريه قابل عمرو اديله السى فى وحاول تاخد منه
معاد تست اى كيو وانجلش ولو نجحت هتضبط عمرو شاب لذيذ وجنتل جدا ومرتباته
ممتازه
*بنك العربى الافريقى ادى السى فى لامن تحت وخلوهم يطلعوه لاستاذ محمد
طارق ولو انت شاطر اطلعله بنفسك واديله السى فى هيتصل بيك ويديك معاد
امتحان امتحانهم صعب اوى ذكاء وانجلش بس مرتبتهم حلوه اوى
* بنك مصر ايران بيطلب على طول على طول مرتباته اول 6 شهور تعبانه بعد كده
بتبقى كويسه والتثبيت بعد6 شهور روح وادى سى فيهك لاستاذ سعيد حامد مدير
الموارد شخصيا مش لحد غيره امتحانهم من اسهل الامتحانات كام سؤال معروفين
ايه السهم ايه السند ما هى يزانيه البنك وحبه معلومات عامه
*بنك السى اى بى تقدم عن طريق النت هتقابل محمد سليم او استاذه راندا خضير
والوظائف للخرجين هى تيلر وكاستمر سرفيس طبعا فمترحش تعمل شاطر وتقولهم
عاوز اشتغل اى وظيفه غير دول ماشى وبعدها لو عديت هتروح امتحان زى بتاع
تنميه الصادرات ففرع البنك فالمريلاند
*بى ان بى باربيا بنك جديد الاتش ار بتاعته فاخر دور فاركاديا مول فالدور
التامن يعنى نظامه قدم السى فى واكد عليهم يبعتولك هيتصلو بيك يحددولك
مقابله سعات بتبقى جروبات وسعات بتبقى فرد فرد ونظام الجروبات كله قاعد مع
بعضه والسؤال بيلف لو نجخت بتروح امتحان تانى مرتباته كويسه عاديه يعنى
فاول 6شهور وبعدها كويسه جدا
* بنك الاسكان والتعمير نظامه امتحان كتابى الاول صح وغلط وكلام من ده وبعدها انترفيو مع لجنه بنك محترم مرتباته عاديه
*بنك قناه السويس مرتباته متوسطه نقدر نقول جيده ابعتله بالبريد نظامه
لجنه خماسيه ولو نجحت امتحان فالجامعه الامريكيه زى تنميه الصادرات
*بنك فيصل الاسلامى اول سنه مرتباته ضئيله جدا بعد اول سنه تثبيت ومرتب
عادى نظامه امتحان مع لجنه خماسيه فقط كام سؤال انجلش وحبه اسئله محاسبه
خليك واثق فنفسك وطبعا هو طالب دلوقتى وخدو بالكو بيفتح التقديم
والاختبارات كام شهر فالسنه بس
*بنك بلوم نظام امتحان زى بتاع التنميه الصادرات بس سهل اوى ومرتباته جيده جدا جدا
*بنك عوده انترفيو فقط مرتباته جيده قدم ففامبنى الادارى اللى فبرج الجيزه
ادام تمثالنهضه مصر طبعا وانت بتقدم هتكون جنب مصر ايران اللى هو فشارع
تشارل ديجول ادام جنينه الحيوانات فبرج الالوميتال بعد الفور سيزون
ارجو ان يكون موضوعى مفيد وده والله بناء على لف وتعب ومعلومات من اصحابى
وجمعت كل ده عشان خاطركم ويا رب اكون فيدتكم ومكنش بخلت باى معلومه على
اخواتى فالمنتدى وى سؤال انا جاهز ويا ريت اشوف ردودكم على الكلام ده
واستفسارتكم
ويا جماعه كل اببنوك اللى كتبتها يمكن النجحاح فيها بدون واسطه والله
متقلقوش يعنى بس معظم بيشترط تكون جايب جيد مع العلم ليا صديقى ت انجلش
مقبول واشتغل بدون واسطه هى نصيب وارزاق بس المهم يكون فيه سعى وادينى
نقلتلكم معلومات اهى هتفدكم بامر الله
وشكرا
__________________
انتهينا خلاص ... ودع البلاص
الخميس أبريل 03, 2008 2:22 am